Izvor: skroz.blog.hr

stariji, niko vrime mučidu, onda isfalidu kuvaricu i spizu, a onda se počimje palamudit i štroligavat…

svašta se tot more čut…

lipi pametni besid a borami i stvari za koje bi se čovik moga u sekund pokarat…
različid je svit, jema nas svakojaki', svak tišči za se da jema prav…
za falivene stvari, krividu druge, a za dobre, jedino oni miritaju pofalu…

meni puno puti, ote monade ulizu na je'no a izlizadu na drugo uvo, jerbo se ne dan namatat, a i moždane sa punin stumikon ne radu tuta fotca, pa in ne mogu kalavat tamo di su najtanji…

jema svita ča se omar najididu ča in se ne begenaje, ča i' pačifiko gledan u joči, a bidni i neznadu da i' ja, puno puti i ne vidin odisprid sebe, deboto su mi ka o' cakla…

kroza ove puste godine, čovik uvati jedan mot i nauči se ka' se triba uštekat u palamuđenje a ka' triba činit kuco…
dogodi se digod da i zagucan, oli mi škopja na šempjarije ča se bale, pa se znan i pokarat…
inšoma, poslin mi bude krivo ča san bija mona i da' se uvatit ka' na baketinu…

jučera smo feštali cili dan, skupila se famija, susidi, prijateji, bilo nas je ka' Rusa…
vanka je puvala južina, vrime deboto otužno…
čakulalo se je, ča je ko tija, padale su i batude, a najvišje su se spominjala dica i skule…
narafski, da je bilo busanja sa onin, da moja gre u ovu skulu, moja u onu, moj gre simo, moj gre tamo, moja jema to, moja jema ono...

sideć onako sa bande, razmišjan kako se je oto dogodilo da mi rodite'ji postanemo taki cukuni…

očemo, ama baš svi očemo o' naše dice napravit lumene…

takmičidu se koja je skula bo'ja, poznatija…
na forcu, i' turamo tamo di oni, njanci nebi povirili, a nekmoli odili učit…
itamo puste pineze za privatne skule…
stiščemo i' za gušu, ka' malo popustidu…
ostanemo inkantani, ka' neki o' nji škrokaju…
deboto smo uvriđeni…činimo šotokuco…

ka' koje dite fini skulu onda se oto udre na sva zvona, svi moradu znat, svi čekamo pofale, da se nan čestita, ka' da jedino mi miritamo…restemo sami o' sebe u svojin jočiman…

nisan papan, i znan da je oti svit uložija puno…
i živac i pinez…

a na koncu, puno puti se dogodi da ota, edukana dica tuku ruzinu u škveru…
puste godine nervožitadi, karanja u famiji, šticavanja, mirenja, pa sve tako unaokrug, sve je bilo za u vitar…

oho, načedu se sa' oni koji čedu omar znat zara čega je tako…
ni njima kjaro da je i u drugin mistima na ovoj zema'jskoj baloti tako…
je, jema mista di je zeru bo'je, ali sve je oto jedan paštroč, di te niko ne pita ko si, ča si, ča ti piše odispri' imena, nego kako radiš i koliko moš radit…

ne triba mi niko govorit, da mi svi očemo najboje svojoj dici…

ali ne triba ni svoje morbine priko nji' ličit…

ne moredu svi bit doturi, profešuri, magistri, inđinjeri…
nisu svi rojeni za oto...

i nečedu zara tega bit manje vridni i pošteni…

ča fali jednemu marangunu, bravaru, pituru, meštru za makinje, meštru o' vode, marineru na vaporu, kamarjeru?

ka' boje pogledaš, šnjima se postupa ka' s čiron na guici, tučedu višje pinez, svak i' zove, časti, tišči vezu šnjima, lagodi in i gre niz dlaku…
i nima i' puno…

doture, profešure, arhitekte ša'jemo kvagu svako malo…
ka' oni falijedu sve gre uprdec i neda se ni prinapravait ni rikuperat…
a nji' jema na mašure…

molajmo našu dicu da samo odlučidu ča če radit u životu…

jerbo i tako, ono ča budedu i kako budedu radili, nečedu naučit u skuli…

oto če i' život naučit…

a mi samo stojmo u fermi da i' znamo potakjat ka' triba, oli in dat ruku ka' zapnedu…

pametna su oto dica…

pinili mi, oli nepinili, snačedu se oni i prez nas…
postat čedu i oni jednega dana meštri…

ka recimo ja, koji san obišni manoval, a jopeta san posta meštar za turpijanje i rašpanje…

e…